Dastid Ferati i cili prej disa vitesh jeton dhe punon në Japon si pedagog i arkitekturës dhe hulumtues shkencor në Universitetin e Tokios prej disa ditësh ndodhet në Shqipëri. Ai bashkë me disa ekspretë nga Japonia ka parë nga afër zonat e prekura nga tërmeti. Dastidi ka lindur në Mitrovicë, ku ka mbaruar shkollën fillore dhe të mesme ndërsa studimet për arkitekturë i filloi në vitin 2007 në Universitetin e Prishtinës. Gjatë përfundimit të studimeve u bë pjesëtar i ekipit për projektimin e masterplanit Prishtina 2012-2022. Pikërisht aty mori rrugë dhe interesi i tij për projektimin e qyteteve, sidomos të dy qendrave botërore Nju Jork dhe Tokio; dy qytetet e para me popullsi 20 milionë banorë që në vitin 1950. Kështu, duke parë që Nju Jorku nuk ishte një risi për të, ai filloi të hulumtonte mundësi për të vizituar Tokion. Në vitin 2013 Dastidi shkoi në Universitetin e Tokios në Japoni, fillimisht për një periudhë 6-mujore në programin që kishte fituar dhe më pas për studimet master. Jeta në Japoni i la mbresa të mëdha. Në fakt, suksesin atje Dastidi e përjetoi menjëherë pas studimeve master, tema e të cilave ishte: “Planifikimi dhe dizajni urban në Tokio”. Sugjerimet e tij jo vetëm që u morëm parasysh, por u implementuan nga qeveria vendore në Tokio. Kështu, me një fitore në xhep, Dastidi nisi doktoraturën, po në Universitetin e Tokios, por këtë herë, duke u përqendruar te projektimet e kampeve të refugjatëve. Tanimë, ai ka 6 vjet që jeton atje. Kujtojmë se ai prej kohësh është përqendruar në projektimin e kampeve të refugjatëve, Kakuma, si një ndër kampet më të mëdha të refugjatëve në Afrikë.