Fermerët e Myzeqesë, ashtu siç kishin paralajmëruar ditë më parë, protestuan dje në mes të shiut në Tiranë përpara Ministrisë së Bujqësisë. Ata thanë se “nuk pretendojnë fonde shtesë në kurriz të taksapaguesëve shqiptarë dhe se nuk kanë dalë për të lypur”. Ata kërkojnë një skemë subvencionimi që t’i mbështesë realisht. Fermerët i kërkojnë sot Ministrisë së Bujqësisë që të ndryshojë skemën e subvecionimit për ta dhe të rregullojë mekanizmin e TVSH-së dhe nga fondi i emergjencës qeveria t’u akordojë fernerëve 5 mijë lekë për dynym për mallin e hedhur dëm sepse ata nuk mund të mbjellin sërish, pasi nuk kanë shlyer ende furnitorët e imputeve. Kërkesat e ripërsëritura në protestën e katërt të fermerëve, janë kompensimi me çmim dysheme i produkteve stok si pasojë e çregullimit të tregut. Për këtë, fermerët kërkojnë ngritjen e një agjencie pranë Ministrisë së Bujqësisë që të merret me studimin e tregut dhe orientimin e fermerëve, prandaj, sipas tyre, mungesa e një agjencie, apo zyre të tillë bëri që fermerët të përballen me situatën aktuale emergjente.