24 janari është dita ndërkombëtare e arsimit. Në këtë ditë në mbarë botën organizohen protesta, aktivitete që kanë si qëllim reflektimin dhe tërheqjen e vëmendjes për qeveritë që t'i kushtojnë më shumë rëndësi arsimit si një nga mjetet më të përshtatshme për të shpëtuar nga varfëria. Në fakt vitet e fundit zhvillimet në fushën e arsimit në të gjitha nivelet nuk kanë kaluar pa zhurmë. Arsimi i lartë ka qenë ai që ka pasur më shumë zhvillime, të cilat janë shoqëruar me lëvizje studentore. Protestat masive nisën në dhjetor të 2018 nga një numër i lartë studentësh nga e gjithë Shqipëria, të cilat kishin në fokus disa pika që u përmblodhën në një dokument të quajtur" Pakti për Universitetin", ku qëllimi i vetëm ishte përmirësimi i cilësisë së arsimit në dobi të të studentëve, duke përfshirë këtu të drejtat që të rinjtë duhet të kenë në sajë edhe të statusit ekonomik dhe social që kanë . Por mesa duket mos realizimi i këtij pakti ka sjellë sërish pakënaqësi duke ndezur ditët e fundit protesta, ndërkohë që sot një tjetër protestë shumë kreative mbahet në pedonale. Studentët kanë ngritur Universitetin e korrupsionit dhe do të lëshojnë diploma dhe doktoratura nga ky universitet. Kjo është mënyra jonë për tu tallur jo vetëm me Paktin për Universitetin por dhe me sistemin korruptiv të ngritur nëpër universitetet tona" tha- Rigels Xhemollari nga "Qëndresa Qytetare".