Provinca e Breshias ka qenë një nga më të prekurat edhe pse në media është trumbetuar më shumë Bergamo, diferenca është diku te 100 pacientë që kanë ndërruar jetë. Fatmirësisht, prej 5 ditëve, numrat janë në rënie, kjo na e ka lehtësuar disi punën dhe tashmë presioni ka filluar disa të bjerë. Është shtuar numri i atyre që kanë dalë të shëruar nga spitali. Julian Balla prej 10 vjetësh ushtron profesionin e tij si mjek në Spitalin e Breshias. Në një lidhje skype nga spitali që ka pasur numrin më të lartë të të shtruarve me Kovid-19 mjeku Balla na tregoi për situatën atje. "Situata është në përmirësimin, presioni ka filluar të bjerë nga pak, por gjithsesi mbetet shumë i lartë sepse numri i pacientëve është shumë i lartë, kemi qenë gati në kolaps total përsa i përket shtretërve dhe arritëm në një fazë që pacientët nuk kishim ku ti vendosnim dhe ato skena që u bënë të famshme në Spanjë që pacientët shtriheshin në tokë se as barela nuk kishte, e njëjta situatë para pak ditësh ka qenë edhe këtu tek ne. Por siç e thashë situata ka filluar të lehtësohet sado pak". Sipas mjekut Balla, shifrat që ai ka pasur deri dje pasdite për Breshian flasin për diku 8757 të infektuar, në total dhe 20% e tyre janë të shtruar në spital. "Bëhet fjalë te diku 1600 pacientë të shtruar me Kovid-19 dhe shtretërit kanë qenë të kufizuar. Por lajmi pozitiv është se numri i të shëruarve është në rritje. Dje në Breshia numëroheshin rreth 150 të shëruar. Dhe kjo ka qenë në rritje jo vetëm në Breshia por në gjithë Italinë." -tha mjeku Julian Balla nga Spitali i Breshias.