Fundjava ka qenë ditë pozitive, me aq sa mund të quhet pozitive, për të gjithë rajonin e Lombardisë, sipas presidentit të rajonit Attilio Fontana. Lombardia aktualisht ka të paktën 46 mijë të infektuar dhe të paktën 7900 të vdekur, zona më e goditur jo vetëm në Itali por edhe gjithë Evropën. Ka një rritje të lehtë të të infektuarve, por ulje të atyre që dalin nga terapia intensive. Fisnik Asllani është infermier “Policlinico di Monza” dhe është i pari që pret të prekurit si pjesë e ndërhyrjes së shpejtë në poliklinikën e Monzës. "Ne bëjmë dy klasifikime përsa i përket të sëmurëve kodi i kuq dhe kodi gri. Kodi gri është kur simptomat klinike janë pozitive por tamponi del negativ dhe kodi i kuq është kur dhe tamponi është pozitiv. Pacientët që ikin në shtëpi me simptoma të lehta u jepet terapia në shtëpi. Duke bërë tamponin është pozitive sepse ti bën një klasifikim pa simptoma dhe pacientëve që janë pozitiv por me simptoma të lehta. Por jo gjithmonë tamponi del pozitiv. Ka disa raste që kanë tamponin negativ por simptomat klinike janë pozitive" Autoritetet shëndetësore atje kanë bërë thirrje për kujdes maksimal për qytetarët pasi kurba mund të ndryshojë shumë shpejt. Guvernatori Fontana tha se ditët e uljes së numrit të infektuarve dhe viktimave, janë shumë pranë, por qytetarët duhet të zbatojnë masat shtrënguese që janë në fuqi.