Shqipëria duhet të ketë një strategji parandalimi të dyfishtë për koronavirusin që do të thotë se izolimi dhe mbajtja e distancës sociale duhet të eci paralelisht edhe me gjurmimin e çdo rasti pozitiv. Por a i ka kapacitetet Shqipëria ta vërë në zbatim këtë strategji të dyfishtë mbrojtjeje? Prof.Asoc. Fabian Cenko, epidemiolog është i mendimit se me zgjerimin e hartës së të prekurve nevojitet trajnimi dhe shpërndarja e stafit të trajnuar në të 12 qarqet e vendit."Këtu nuk shtrohet çështja nëse ka burime apo si mund të gjenden ato dhe të vihen në dispozicion në luftë tonë ndaj Covid-19. Jo më larg se dje OBSH rekomandoi një set masash që kishin të bënin me vende që kanë një sistem shëndetësor jo shumë të konsoliduar ku dhe impakti dhe pasojat e kësaj epidemie mund të jenë edhe më të paparashikuara. OBSH sugjeronte që stafet shëndetësore të këtyre vendeve duhet të trajnohet por duhet sidomos të mbulohet e gjitha harta e zonave të prekura. Pra nuk duhet të bazohemi dhe të mjaftohemi vetëm me një personel shëndetësor që operon vetëm në Tiranë. Para 2 ditëve 1/3 e qarqeve ishin të mbuluara me raste të identifikuara zyrtarisht me Covid-19. Ndërhohë nga dje harta është zgjeruar, pra kemi 10 qarqe nga 12 gjithsej ku janë identifikuar zyrtarisht raste me Covid-19. Pra praktikisht e gjithë Shqipëria është e prekur, dhe si mundet në këtë situatë të shpresojmë dhe të dëshirojmë ta kontrollojmë virusin vetëm nga Tirana"- tha Cenko.