Numri i të infektuarve me Kovid19 tashmë në vendin tonë sipas të dhënave zyrtare të ministrisë së shëndetësisë ka shkuar në 277 persona, ndërkohë që ditën e djeshme ka humbur jetën edhe një person duke e çuar numrin e viktimave në 16 persona. Në fakt që prej nisjes së masave të marra, distancimit social, mbylljes së një pjese të madhe të aktiviteteve publike dhe private, vendosjes së një orari të kufizuar për blerjet e nevojshme, duket se situata në vend nga ajo që raportojnë specialistët është e stabilizuar, me një rritje graduale të rasteve. Por a e ka arritur Shqipëria, pikun e rasteve dhe kur do të fillojë të kemi një ulje të numrit të infektuarve? A mund të kemi një rikthim të rasteve nëse do të fillojmë të dalim nga izolimi?Këto janë pyetjet më të shpeshta që po bëhen çdo ditë, por si e vlerësojnë epidemiologët këtë situatë, kur tashmë kemi hyrë në muajin prill dhe jemi gati një muaj nën efektin e masave të marra. Ne ishim në një lidhje Skype me doktor, Dritan Ulqinaku, epidemiolog pranë Institutit të Shëndetit Publik. Ai tha se: "Epidemia e Kovidit në Shqipërinë është në një linjë stabël të numrit të rasteve të shfaqur. Është brenda kufijve të menaxhueshëm. në raport me botën ne e kemi në nivele të lehta nivelin e vdekshmërisë, por mund të ndodhë që nj ditë e vetme të bëjë ndryshim e shifrave. Në mesin e epidemisë nuk bëjmë dot një analizë sesi u menaxhua apo sesi ka qenë raporti i vdekshmërisë. Rëndësi ka që deri tani kjo situatë është e menaxhueshme. Përsa i përket testeve të Kovid-19 konfirmoj që janë shpërndarë në të gjithë Shqipërinë. Fatmirësisht një pjesë e mirë e qyteteve nuk janë akoma të kontaminuar. "-tha Ulqinaku. Por sa do të zgjasë kjo epidemi në gjykimin e tij? "Unë e lidh më eksperiencën e virusit të gripit. Nëse e krahasojmë ose do të ketë të njëjtën sjellje ky virus i ri me at të gripit, vala e epidemisë së gripit luhatet nga 10-15 javë, nuk e kemi gjatë rritjes së temperaturave por rikthehet sërish në dimër. Shpresojmë që Kovid 19 t'i ngjasojë virusit të gripit në sjellje. Por duhet theksuar se Kovid-19 është një virus i ri dhe ne akoma nuk e dimë sesi do të sillet ai në stinën e verës. E vetmja gjë që dimë me saktësi është se distancimi social e mban nën kontroll".