Komisioneri për Mbrojtjen nga Diskriminimi i ka kërkuar qeverisë së kryeministrit Edi Rama që të përfshijë në paketën financiare edhe kategori të caktuara sociale apo ekonomike që, duke mos përfituar atë që është quajtur “Pagë Lufte”, rezultojnë përveç të tjerave edhe të diskriminuar. Përmes një letre drejtuar ministrit të Shtetit për Rindërtimin, Arben Ahmetaj dhe ministres së Shëndetësisë Ogerta Manastirliu, komisioneri u kërkon që të përshijnë në paketën financiare për të ndihmuar shtresat vulnerabël, komunitetin rom dhe atë egjiptian dhe të gjithë ata që në kushte normale kanë qenë gjithnjë të disavantazhuar në tregun e punës dhe që tani gjenden në vështirësi si pasojë e situatës së rëndë të krijuar nga koronavirusi. Robert Gajda, Komisioneri për Mbrojtjen nga Diskriminimi shpjegoi arsyen e kësaj kërkese.