Pelerina e parë e Supermenit dhe llulla e Bilbo Bagins, do të dalin në ankand të rrallë të kujtimeve të Hollivudit, javën e ardhshme dhe pritet të mbledhin 100 deri në 200 mijë dollarë. Objektet skenike nga Supermani i Kristofer Reeve dhe trilogjia e Zotit të Unazave, do të dalin në shitje të hënën, bashkë me rreth 400 tituj të tjerë nga kinemaja në shtëpinë e Ankandece Julien’s në Los Angeles. Për zëdhënësin e kësaj shtëpie ankandesh, Jason de Bord, bëhet fjalë për një seri të mrekullueshme objektesh. “Është diçka shumë e rrallë që i ka mbijetuar filmit të parë Supermen, të 1978. Është një film shumë i dashur për të gjithë. Kristofer Reeve ishte i mrekullueshëm, nuk ka patur asnjë Supermen tjetër si ai. Pelerina mund të kapë një vlerë deri në gjysmë milioni dollarë”. Në anën tjetër, llulla e Bilbo Bagins, e shoqëronte Ian Holmin në “The Fellowship of the Ring,” dhe sipas shtëpisë së ankandeve, është i vetmi shembull nga filmi në duart e koleksionistëve. Bilbo e përdorte llullën për të nxjerrë tym në formë unazash. Veç tyre në ankand do të jetë edhe koleksioni më i rëndësishëm i Star Trek, sipas organizatorëve që përfshin një xhaketë të veshur nga Kapiteni Kirk në Star Trek II që mund të kapë vlerën e 100 mijë dollarëve. Ndërkohë që të interesuarit mund të gjejnë në ankand edhe kujtime nga filma klasikë si Gone with the Wind, apo nga Jurassic park dhe Forrest Gump.