Presidenti i Shteteve të Bashkuara, Donald Trump, i bëri thirrje Meksikës që, me ndihmën e SHBA-së, të luftojë kartelet e drogës, që besohet të jenë përgjegjëse për pritën ndaj një gripi amerikanësh mormonë në veri të Meksikës, ku mbetën të vrarë nëntë gra e fëmijë. “Nëse Meksika kërkon apo i duhet ndihmë për pastrimin e këtyre përbindëshave, Shtetet e Bashkuara janë të gatshme dhe janë në gjendje të përfshihen dhe ta bëjnë punën shpejt e në mënyrë efektive”, tha Trump në një postim në Twitter. Prita ndodhi të hënën në Ranço de la Mora, një zonë famëkeqe për trafikantët e drogës. Julian Lebaron tha për mediat në Meksikë se kushërira e tij ka qenë duke udhëtuar me katër fëmijët e saj, kur automjeti i tyre është sulmuar dhe i është vënë zjarri me viktimat brenda. Dy automjete të tjera u gjetën po ashtu me trupat e pajetë të dy grave, të një djali dhe të një vajze. Trump ia bëri të qartë presidentit të Meksikës, Andres Manuel Lopez Obrador, që pretendon se e ka prioritet luftën ndaj karteleve të drogës, se këto të fundit janë “bërë aq të mëdha dhe të fuqishme saqë ndonjëherë ju duhet një ushtri për të mposhtur një ushtri tjetër”.