Forcat tokësore të Rusisë janë më të mëdha tani sesa në kohën e pushtimit të plotë të Ukrainës nga Moska në shkurt 2022, por cilësia e tyre është ulur që atëherë, tha të hënën një zyrtar i lartë ushtarak i NATO-s. "Cilësia e atyre forcave ka rënë," tha kryetari i Komitetit Ushtarak të NATO-s, Admirali Rob Bauer, duke treguar gjendjen e ushtrisë së Putinit. "Për momentin, rusët nuk janë i njëjti kërcënim si në shkurt 2022, kështu që kemi pak kohë për t'u përgatitur," tha ai, duke shtuar se kjo nënkupton rritjen e investimeve në industrinë e mbrojtjes.Bauer i kërkoi më pas bizneseve të përgatiten për një skenar të kohës së luftës dhe të rregullojnë linjat e tyre të prodhimit dhe shpërndarjes në përputhje me rrethanat, në mënyrë që të jenë më pak të prekshëm ndaj shantazheve nga vende të tilla si Rusia dhe Kina. "Nëse ne mund të sigurohemi që të gjitha shërbimet dhe mallrat thelbësore të ofrohen pa marrë parasysh pengesat, atëherë kjo është një pjesë kyçe e politikës sonë parandaluese", tha në Bruksel kryetari i komitetit ushtarak të NATO-s. Bauer foli në një aktivitet të qendrës së politikave evropiane, ku vuri në dukje edhe varësinë perëndimore nga furnizimet nga Kina, me 60% të të gjitha materialeve të rralla të tokës të prodhuara dhe përpunuara atje. "Ne do të ishim naivë po të mendonim se Kina nuk do ta përdorë kurrë këtë fuqi. Udhëheqësit e biznesit në Evropë dhe Amerikë duhet të kuptojnë se vendimet tregtare që ata marrin kanë pasoja strategjike për sigurinë e kombit të tyre," theksoi Bauer. "Bizneset – sipas tij- duhet të përgatiten për një skenar të kohës së luftës dhe të rregullojnë linjat e tyre të prodhimit dhe shpërndarjes në përputhje me rrethanat. Sepse ndërsa mund të jetë ushtria ajo që fiton betejat, janë ekonomitë ato që fitojnë luftërat."