Zjarret që po shkatërrojnë BE-në kanë shkrumbuar më shumë se 1 milion hektarë tokë këtë vit, duke e bërë vitin 2025, më të rëndin të regjistruar ndonjëherë, plot një muaj para se të mbarojë sezoni i zjarreve. Zjarret vdekjeprurëse që kanë zbrazur fshatrat dhe kanë detyruar fermerët të bëhen zjarrfikës kanë përfshirë katër herë më shumë tokë këtë vit sesa mesatarja për të njëjtën periudhë gjatë dy dekadave të fundit, sipas të dhënave zyrtare. Zjarret kanë djegur shtëpi, kanë shkrumbuar pyje dhe kanë izoluar qytete të largëta. Të dhënat nga Sistemi Evropian i Informacionit për Zjarret në Pyje (Effis), i cili daton që nga viti 2003, tregojnë se 1 milion e 15 mijë hektarë tokë janë djegur këtë vit, duke thyer rekordin e mëparshëm prej 988,544 hektarësh që u vendos në vitin 2017, me javë të tëra moti të rrezikshëm dhe zjarresh që pritet të vijnë. Flakët shkatërruese kanë cliruar 37 milionë ton dioksid karboni, afërsisht aq sa emetimet vjetore të CO2 të Portugalisë ose Suedisë. Zjarret përfshinë pjesë të mëdha të Evropës Jugore këtë muaj, ndërsa një valë e nxehtësisë, e bërë më e gjatë dhe më e fortë nga ndotja nga lëndët djegëse fosile, i shtyu temperaturat mbi 40 gradë Celsius në pjesën më të madhe të Mesdheut dhe Ballkanit. Periudhat e zgjatura të nxehtësisë përvëluese thanë bimësinë, e cila në vende si Spanja dhe Portugalia ishte rritur me shpejtësi pas një pranvere të lagësht, duke lejuar që zjarret të digjen më shumë dhe të përhapen më tej.