Mëngjesin e së dielës është shfaqur një vatër e madhe zjarri në pikën e grumbullimit të mbetjeve urbane në Kolsh, e cila ka shkaktuar një shtëllungë të madhe tymi në ajër pranë zonave të banuara. Ndërsa dy mjete të shërbimit të zjarrëfikses së qytetit të Kukësit po luftonin për shuarjen e zjarrit, smogu ka përfshyrë fshatrat dhe një pjesë të qytetit që janë në afërsi me pikën e grumbullimit. Kjo pikë e mbetjeve është përfshirë disa herë nga zjarri brenda pak muajsh duke shkaktuar një ndotje të madhe. Shqetësues mbetet fakti që ndodhet shumë pranë lagjeve të Kukësit, duke rrezikuar kështu edhe banesat. Prej vitesh është kërkuar ndërtimi i një impianti të përpunimit të mbetjeve në fshatin Përbreg për të zgjidhur këtë problem, pasi vend-grumbullimi i Kolshit është i vetmi vend për mbetjet urbane si dhe është i tej mbushur.