Parku më i madh tematik në Gjermani do të rihapet për vizitorët të martën pasi një zjarr i madh, një ditë më parë, bëri që një re e dendur tymi të zi u pa në qiell. Europa-Park, në qytetin Rust, afër kufirit francez, u hap vetëm me disa kufizime të vogla pas zjarrit të së hënës – tha agjencia gjermane e lajmeve DPA. Zjarri shpërtheu në një dhomë kontrolli për një nga atraksionet, pasditen e të hënës dhe doli jashtë kontrollit. Në këtë kohë, rreth 25 mijë vizitorë ndodheshin në park. Alarmi i zjarrit funksionoi sic duhet dhe parku u evakuua ndërkohë që 450 zjarrfikës, policë dhe personel emergjence mbërriti në vendngjarje. Dy zjarrfikës u lënduan lehtë por asnjë vizitor nuk u dëmtua. Shkaku i zjarrit është ende nën hetim dhe zona përreth vendit të ngjarjes do të qëndrojë e mbyllur. Europa-Park është një destinacion turistik i shumë-frekuentuar që tërhori më shumë se 6 milionë vizitorë vitin e kaluar, kryesisht nga Gjermania, Franca dhe Zvicra. Ai ka zona me tematika të bazuara në vende të ndryshme evropiane dhe tre të bazuar në fantazi. Në park po ashtu zhvillohen edhe konferenca dhe ai është një vend i preferuar për evente dhe produksione televizive.