Presidenti i Turqisë, Recep Tayip Erdogan bëri të ditur këtë të shtunë se nëse triumfon në zgjedhjet presidenciale të vitit 2023, stafetën do t’ia dorëzojë rinisë. “Kërkojmë për herë të fundit mbështetjen nga populli ynë në vitin 2023”, tha presidenti i Turqisë gjatë një fjalimi në Samsuda, duke lënë të kuptohet se nëse ai fiton në zgjedhjet e ardhshme, do të jenë të fundit për të. Erdogan shtoi se flamurin e shenjtë do t’ia dorëzojë të rinjve dhe se ata janë faktor kyç për zgjedhjet e ardhshme të përgjithshme dhe presidenciale. Recep Tayip Erdogan është në pushtet që nga viti 2003, por kohët e fundit është përballur me shumë probleme, një nga më të mëdhajat, sfida ndaj inflacionit që ka arritur në 84.4%. Në tetor, Erdogan kishte përsëritur dëshirën e tij për të përgatitur një kushtetutë të re turke që do të ishte “demokratike, e thjeshtë dhe vizionare”. Sipas disa vëzhguesve, kjo u interpretua si një qëllim për të modifikuar kufirin e dy mandateve presidenciale të parashikuar nga kushtetuta turke.