Policia greke ka vënë në pranga 3 persona, në mesin e të cilëve, dy kushërinj të një ish ministri të njohur në Greqi. Emri i ish ministrit nuk është bërë publik në mediat greke, duke qenë se rasti po ndiqet nga prokuroria dhe po ruhet për efekt të sekretit hetimor. Sipas mediave greke, të arrestuarit akuzohen se kishin ngritur një laborator të falsifikimit të heroinës në Melissia, dhe më pas e shisnin në sheshet e qytetit të Athinës. Policia greke gjatë kontrolleve të disa banesa në Melissia, sekuestruan rreth 610 gramë heroinë, 900 metadon, kanabis dhe një pistoletë, materiale këto të cilat do të referohen në Prokurori për veprime të mëtejshme hetimore. Sipas informacioneve, këta dy persona në momentin e arrestimit kanë treguar lidhjen e tyre të gjakut me ish ministrin grek. Njëri prej tyre ka të njëjtin mbiemër dhe të njëjtin emër ndërsa me automjetin që ata përdornin bashkëpunëtori i tij grek shpërndante dozat e heroinës. Policia bëri me dije se droga është dërguar në laborator dhe pritet të ekzaminohet nëse është e pastër apo e përzier.