Policia e Lushnjës ka arrestuar një 38-vjeçar dhe ka shpallur në kërkim një tjetër shtetas, të dyshuar si autorë të një vjedhjeje të ndodhur gjatë natës në lagjen “Savër”. Operacioni policor u organizua pas kallëzimit të pronarit të një biznesi, i cili raportoi vjedhjen e 4 motomjeteve elektrike dhe sendeve të tjera me vlerë. Pas veprimeve hetimore dhe informacioneve të siguruara në rrugë operative, u bë i mundur identifikimi i autorëve të dyshuar. Si rezultat u arrestua Ergest Prençe, 38 vjeç, banues në fshatin Pirrë, ndërsa bashkëpunëtori i tij ndodhet në kërkim. Hetimet po vijojnë për kapjen e personit të dytë dhe dokumentimin e plotë të kësaj ngjarjeje, si dhe për identifikimin e përfshirjes së tyre në raste të tjera të ngjashme vjedhjeje. Policia e Lushnjës dhe strukturat hetimore të Komisariatit të Policisë po punojnë intensivisht për zbardhjen e plotë të aktivitetit kriminal të këtyre shtetasve dhe vënien e tyre para drejtësisë.