Presidenti i Serbisë, Aleksandër Vuçiç priti plot tetë orë përpara se të përgjigjej për rrëmbimin e policëve serbë në veri të Kosovës nga ushtria e vendit të tij. Duke akuzuar kryeministrin e Kosovës Albim Kurti se kërkonte luftë, Vuçiç ka bërë deklarata të forta për situatën mes Kosovës dhe Serbisë. Ai thotë se çdo gjë tashmë është në udhëkryq dhe nuk është më e sigurt as garantimi i paqes. Sipas tij, është kaluar Rubikoni dhe se kthimi në normalitet do të jetë i vështirë. “Jemi në udhëkryq. Jo për shkak të qëllimeve tona për të mos pasur paqe, por sepse është një njeri në Ballkan që dëshiron të ketë luftë dhe të provokojë luftë me çdo çmim”, – ka thënë Vuçiç. Duke folur për ndalimin e 3 pjesëtarëve të policisë së Kosovës, Vuçiç tha se ata janë arrestuar 1.8 kilometra brenda kufirit në rrugën Orahovë – Gnjilicë. “Është shumë larg Tresava-Batnjik ku kanë lënë veturën e tyre, ndërsa Kurti thotë se janë arrestuar 300 metra larg linjës. Çfarë po bënin 300 metra larg vijës, pa e lajmëruar KFOR-in. Ata nuk kanë çfarë të kërkojnë në atë zonë pa miratimin e Kfor-it”, – pyeti Vuçiç. “Po bëhet një hetim. Ata nuk janë rrahur, as keqtrajtuar, as shpërfytyruar, gjë që u ndodh serbëve kur arrestohen nga policia e Kurtit. Gjatë arrestimit është marrë parasysh edhe dinjiteti i tyre”, – tha Vuçiç. Ai është përgjigjur po ashtu për ndalimin e makinave dhe mallrave serbë në Kosovë, duke thënë se me këtë lëvizje, Kurti dëshiron t’i sjellë serbët e Kosovës në një gjendje të rëndë urie. “Serbia do të jetë gjithmonë me popullin e Kosovës, nuk do të lejojë kurrë persekutimin e tyre” – tha ai. Pamjet: AFP