Mediat në Rusi kanë paralajmëruar zhvillime të bujshme. Marrëdhëniet e Serbisë me Rusinë dhe BE-në kanë qenë shumë të përfolura këto kohë. Beogradi ëhstë vënë nën presion nga perëndimi që të harmonizojë politikën e saj të jashtme me BE-në dhe të vendosë sanksione ndaj Rusisë ndërkohë që kjo e fundit e do Serbinë nën sferën e saj. Por duket se perëndimi ka fituar në këtë përballje pasi mediat ruse po paralajmërojnë ‘thyerjen’ e Vucicit për sa i takon sanksioneve mbi Rusinë. Në disa artikuj të kohëve të fundit, mediat ruse shkruajnë se Vucic do të nisë vendosjen e sanksioneve ndaj Rusisë pas presionit të fortë të perëndimit dhe se ai ka dhënë tashmë udhëzime për të minimizuar lidhjet zyrtare me Moskën. Është paralajmëruar se në mars do të vendoset regjimi i vizave për qytetarët rusë ndërsa kufizimet kryesore do të hyjnë në fuqi para verës. Beogradi, sipas tyre, po përgatit paketën e parë dhe të dytë të sanksioneve por po përpiqet ti rregullojë në mënyrë që të shkaktojnë dëme minimale në ekonominë e vendit. “E respektoj Rusinë por i shërbej Serbisë”, ka thënë Vucic dhe kjo deklaratë është cituar nga portalet e Moskës.