Presidenti i Serbisë Aleksandar Vuçiç tha se Beogradi synon të vazhdojë të ruajë baraspeshën në marrëdhëniet e tij me Perëndimin, Kinën dhe Rusinë si dhe të arrijë një marrëveshje me Kosovën, ndërkohë që përpiqet të anëtarësohet në Bashkimin Evropian. Vuçiç, i bëri këto komente për agjencinë e lajmeve reuters, të enjten në prag të zgjedhjeve parlamentare të 21 qershorit. Para se të anëtarësohet në BE, Beogradi duhet të normalizojë lidhjet me Prishtinën. Pavarësia e Kosovës është njohur nga mbi 100 vende, përfshirë Shtetet e Bashkuara dhe shumicën e anëtarëve të BE-së. Por Serbia, bashkë me aleatët e saj Rusinë dhe Kinën, e ka bllokuar anëtarësimin e saj në Kombet e Bashkuara dhe organizatat e tjera ndërkombëtare. Vuçiç, Partia Progresive Serbe e të cilit është në krye të garës për zgjedhjet e 21 qershorit, tha se Serbia është e gatshme të bisedojë me Prishtinën “në mirëbesim” dhe "pa një afat kohor", por njohja e ndërsjellë nuk është në rendin e ditës. "Ne jemi gati për bisedime por … pa flamur të bardhë," tha ai në një intervistë për Reuters. "Dialogu është i mirëpritur, nëse është një dialog ... në të cilin të mund të shihet se çfarë është e mundur, se ku mund të arrihet kompromis.” "Ne besojmë se është në interesin e shqiptarëve të Kosovës dhe të bashkësisë ndërkombëtare ... të flasim për një rrjedhë të lirë të kapitaleve, njerëzve dhe shërbimeve", tha Vuçiç.