Komiteti Shqiptar i Helsinkit në një raport mbi ecurinë e procesit të vettingut përgjatë periudhës Nëntor 2019-Korrik 2020, thekson se për shkak të specifikave dhe teknikaliteteve të tij, vijon të jetë një proces shumë i rëndësishëm për vendin, por dhe i vështirë dhe me ngarkesë të lartë për institucionet e vettingut. Në tërësi, Komiteti Shqiptar i Helsinkit vlerëson se pavarësisht sfidave, ngarkesës dhe volumit të lartë të veprimeve procedurale dhe hetimore që shoqërojnë këtë proces, ritmet e procesit të vettingut, duhet të jenë më të larta, veçanërisht në shkallën e parë të vettingut që realizohet nga trupat e KPK-së. Komiteti Shqiptar i Helsinkit shton se, në përbërje të Komisionit të Pavarur të Kualifikimit janë 12 Komisionerë, të cilët shqyrtojnë në trupa të përbërë nga 3 anëtarë, çka mundëson dhe krijimin e trupave paraelele. Ndërkohë që në përbërje të Kolegjit të Posacëm të Apelimit janë 7 gjyqtarë, të cilët shqyrtojnë në trupë gjykimi të përbërë nga 5 anëtarë, çka nuk mundëson shqyrtimin në mënyrë paralele të çështjeve.