Ndonëse për pjesën më të madhe të demokratëve Sali Berisha është kryetari i partisë, për gjykatën vijon të jetë Lulzim Basha, edhe pse i dorëhequr publikisht, kjo për shkak se ky vendim nuk është pasqyruar në gjykatë nga partia. Në të tillë situatë, financa dhe drejtimi administrativ i Partisë Demokratike është në duart e Sekretarit të Përgjithshëm, Gazment Bardhi dhe kryetarit të Komanduar, njëherësh kreu i grupit parlamentar Enkelejd Alibeaj. Ligjërimi i Berishës në krye të PD vijon të mbetet peng i gjykatës së Apelit, e për këtë Berisha ligjërisht nuk mund të kryejë asnjë veprim në emër të PD. Ky ngërç u tregua edhe në zgjedhjet e pjesshme të 6 marsit, ku ish-kryeministri nuk arriti të regjistrohej në KQZ si forcë politike, por vetëm në kuadër të koalicionit me LSI dhe PDK. Në këtë këndvështrim, për ish-kryeministrin Sali Berisha do të jetë më e vështirë të procedohet për zgjedhjet e 2023, pasi LSI ndryshe nga 6 marsi, do të ketë kandidatët e vet.