Në nisje të këtij viti kalendarik, ministri i Brendshëm Sandër Lleshaj e konsideroi 2020 si vitin e sigurisë rrugore. Por, kur duhen pak më shumë se dy muaj që ky vit të shënojë ikjen kalendarike, ministri zhvilloi një mbledhje me drejtuesit e sektorit të Policisë Rrugore në Shqipëri, në kuadër të zbatimit të masave për rritjen e sigurisë në rrugë. Në fillim të takimit, Drejtori i Përgjithshëm i Policisë së Shtetit Ardi Veliu, prezantoi të dhënat 9-mujore ku bien në sy ulja e numrit të përgjithshëm të aksidenteve, numrit të viktimave, të plagosurve rëndë etj. Në qoftë se do t’u referohemi treguesve krahasimorë për vitin 2020 dhe të njëjtës periudhë të vitit 2019, konstatojmë se kanë ndodhur 985 aksidente rrugore, me 141 të vrarë, 143 të plagosur rëndë dhe 988 të plagosur lehtë. Krahasuar me të njëjtën periudhë të vitit 2019 kemi, më konkretisht 233 aksidente rrugore më pak. zbatimi i planit të operacioneve, kombinimi dhe kryerja e fushatave sensibilizuese në rrjetet sociale, ka ndikuar ndjeshëm në uljen e numrit të aksidenteve dhe pasojave të tyre që lildhen me shpejtësinë tej normave të lejuara, mospërdorimin e rripit të sigurimit dhe kaskave mbrojtëse, përdorimi i mjetit nën ndikimin e alkoolit, përdorimi i telefonave celularë gjatë drejtimit të mjeteve dhe pjesëmarrja e biçiklistëve në aksidente. Brenda pak javësh, në Kuvend pritet të shkojë paketa me ndryshime në Kodin Rrugor, e cila parashikon ashpërsimin e masave për një sërë shkeljesh. Ministri Lleshaj, gjatë fjalës së tij, u kërkoi drejtuesve qendrorë dhe vendorë të Policisë Rrugore, të fokusohen në punën e tyre në disa drejtime të rëndësishme, nën moton “Vizion zero”, që synon zero viktima deri në vitin 2050.