Prokuroria e Tiranës ka marrë të pandehur dhjetë persona, mes të cilëve dy arkitektë që akuzohen për falsifikim dokumentesh dhe ndërtim të paligjshëm në zonën e Mulletit, që është shndërruar një ndër zonat më të lakmueshme nga ndërtuesit për vila e resorte. Grupi prej 10 personash, dyshohet se përmes falsifikimit të dokumentacionit kanë ndërtuar në mënyrë të paligjshme shtatë vila në një zonë që është pjesë e fondit pyjor të Bashkisë së Tiranës. Skema për ndërtimin e këtyre vilave ka qenë duke paraqitur nëpër institucione dokumentacione sikur vilat ishin të dëmtuara nga tërmeti, apo degraduar nga koha dhe do të rindërtoheshin. Prokuroria thotë se ka rezultuar se dokumentacioni tekniko-ligjor i përdorur pasqyronte të dhëna të rreme, si dhe ka cenuar fondin pyjor. Përveç marrjes së pandehur të dhjetë personave, me urdhër të gjykatës është vendosur sekuestrimi për të shtatë vilat që janë ndërtuar me dokumentacion të falsifikuar.