Kryebashkiaku Erion Veliaj së bashku me ambasadoren e Greqisë në Shqipëri, Konstantina Kamitsi mbollën 25 pemë në ‘Parkun Helen’ në Liqenin e Farkës. Veliaj e cilësoi fushatën e mbjelles së pemëve dhe vijimin e kësaj nisme edhe pas zgjedhjeve të 14 majit, si investimin më të mirë që bëhet për kryeqytetin. “E di që edhe gjatë fushatës u bë ky debat: Jo, po ku janë pemët, jo andej po këtej! Ata që kanë kontribuar, njëri 25, dikush 30, një tjetër 100, tjetri 1000, apo dikush vetëm 1 pemë për ditëlindjen e fëmijës së tij, ata e dinë. Unë besoj se është kjo puna komunitare që ka më shumë duk. Mandatet tona janë të kufizuara, por një pemë mund të jetojë sa jeta e një njeriu dhe besoj që të gjithë ne do themi: Kur ishim të rinj, kur mbillnim pemë tek Liqeni i Farkës, sot e shoh shumë kollaj se këto do kenë bërë hije, por kjo është një ndjesi e jashtëzakonshme.”