Nisma e njoftuar nga Autoriteti i Mediave Audiovizive për të denoncuar përmbajtjet e dhunshme dhe të dëmshme në platformat sociale, ka marrë denoncimet e para, përmes linkut të vënë në dispozicion nga ana e AMA-s. Pesë ditë pasi kryetarja e Autoritetit, Armela Krasniqi njoftoi nisjen e bashkëpunimit me TikTok, janë fshirë nga kjo platformë mbi 20 video për përmbajtje dhune, ekspozimi seksual ndaj fëmijëve dhe nxitje urrejtjeje. Kryetarja Krasniqi thotë se për 40 video AMA ka raportuar në TikTok, nga ku 23 janë hequr nga platforma dhe 17 janë në proces. Sipas të dhënave të publikuara nga Kryetarja Krasniqi, videot e fshira përmbanin në 7 raste, ose një të tretën e videove të fshira, ekspozim të fëmijëve ndaj pornorgrafisë, drogës, alkoolit, duhanit dhe dhunës. Në rastet e tjera videot kanë përmbajtje urrjejtje dhe nxitje dhune për përkatësinë fetare, apo orientimin seksual. Për të njëjtën periudhë, pra vetëm për 5 ditë, janë raportuar për pirateri të produktit audioviziv 156 video, ndër të cilat 112 janë fshirë nga platforma ndërsa 20 profile janë mbyllur menjëherë për të njëjtën arsye, pasi janë raportuar videot që ato përmbanin.