Bora e dendur që ka mbuluar Japoninë veriore në dy javët e fundit ka bllokuar rrugët dhe është fajësuar për dhjetëra vdekje në të gjithë vendin deri më tani, thanë zyrtarët qeveritarë të mërkurën. 15 prefektura janë prekur më rëndë, me sasinë e borës së grumbulluar në zonat më të goditura që vlerësohet të ketë arritur në 2 metra. Borë e pazakontë ka rënë në disa pjesë të Japonisë ditët e fundit, kryesisht për shkak të një mase ajri të ftohtë nga Arktiku që ka qëndruar mbi arkipelagun japonez. Shumica e 35 vdekjeve dhe qindra lëndimeve të raportuara në të gjithë Japoninë u shkaktuan nga rrëzimet e njerëzve që përpiqeshin të pastronin shtëpitë e tyre nga bora. Numri më i madh i viktimave të lidhura me borën, plot 12, u raportua në prefekturën Niigata, një rajon i kultivimit të orizit në Japoninë veriore, përfshirë një burrë në të 50-at i cili u gjet i rrëzuar nga çatia e shtëpisë së tij në qytetin Uonuma. Në qytetin Nagaoka, një 70-vjeçar besohet se vdiq po ashtu pasi ra nga çatia e tij, sipas autoriteteve të Niigatës. Zëdhënësi i qeverisë japoneze paralajmëroi se, megjithëse moti po ngrohej, më shumë rrezik mund të vinte sepse bora do të fillonte të shkrinte, duke cuar në rrëshqitje dheu dhe sipërfaqe të paqëndrueshme. "Ju lutemi kushtojini vëmendje të madhe sigurisë suaj, veçanërisht kur punoni për pastrimin e borës", u tha gazetarëve zëdhënësi.