Udhëheqësi i Koresë së Veriut, Kim Jong Un, mbikëqyri një lëshim testues të raketave strategjike të lundrimit dhe urdhëroi kalimin e vendit në gatishmëri të plotë bërthamore, cka do të sigurojë mbrojtjen më efikase për vendin, tha media shtetërore të premten. Testi u mbajt për të paralajmëruar "armiqtë, të cilët po shkelin seriozisht mjedisin e sigurisë së vendit dhe po nxisin dhe përshkallëzojnë mjedisin e konfrontimit" si edhe për të demonstruar "gatishmërinë e mjeteve të ndryshme të operacionit bërthamor", tha agjencia e lajmeve KCNA. "Ajo që garantohet nga aftësia e fuqishme goditëse është aftësia më e përsosur parandaluese dhe mbrojtëse", tha Kim Jong un. "Është misioni dhe detyra e forcave të armatosura bërthamore të Koresë së Veriut që të mbrojnë përgjithmonë sovranitetin dhe sigurinë kombëtare me mburojën e besueshme bërthamore duke patur gatishmëri të plotë luftarake të forcës bërthamore dhe gatishmëri të plotë për përdorimin e armëve bërthamore". Lëshimi i raketës u krye të mërkurën mbi det në brigjet perëndimore të gadishullit Korean. Ushtria e Koresë së Jugut tha të premten se kishte zbuluar shenja të përgatitjeve të lëshimit të raketave të mërkurën dhe se kishte gjurmuar disa raketa lundrimi pasi ato u lëshuan rreth orës 8 të mëngjesit mbi det. Koreja e Veriut ka punuar për zhvillimin e raketave strategjike të lundrimit gjatë disa viteve, të destinuara këto për të shpërndarë koka bërthamore. Raporti për testimin e raketës erdhi në të njëjtën javë kur Kim Jong un bëri vizita të njëpasnjëshme në shkollat ushtarake duke dhënë mesazhin e besnikërisë dhe rëndësisë së trajnimit ideologjik dhe taktik të oficerëve të rinj ushtarakë.