Stephanie Dubois, një ish-modele 39 vjecare britanike, pësoi një “tromvbozë shumë të rëndë” pas vaksinës që bëri në qytetin qipriot të Paphos. Autoritetet shëndetësore të Qipros thonë se vdekja e saj po hetohet nga Agjencia Evropiane e Barnave, EMA. Por ende nuk është konfirmuar nëse ka të bëjë me vaksinën. Dubois e kishte marrë dozën e parë të vaksinës AstraZeneca më 6 maj. Më 14 maj ajo u dërgua në spital me probleme në frymëmarrje. Por, 5 ditë më vonë ajo ra në koma dhe mjekët nuk kishin shpresa se do të dilte prej saj. Sipas mediave lokale ajo pësoi një hemorragji cerebrale dhe ndërroi jetë të shtunën. Burime nga spitali qendror i kryeqytetit qipriot Nikosia, thanë se ajo nuk kishte patur sëmundje shoqëruese. Në mars, Qipro e pezulloi vaksinën AstraZeneca deri në një vendim të EMA-s. Edhe Gjermania, Franca dhe disa vende të tjera të BE-së e ndërprenë këtë vaksinë, por e lejuan përsëri më 18 mars. Më parë, vetëm dy persona në Qipro kishin pësuar mpiksje gjaku pas vaksinimit me AstraZeneca. Të dy kishin sëmundje shoqëruese, por asnjëri nuk vdiq. Ndërkohë, EMA konfirmoi në prill se përfitimet nga kjo vaksinë e tejkalojnë rrezikun nga efektet anësore.