Mbrojtësit ukrainas po vazhdojnë ti rezistojnë një vale të re të sulmeve ruse në qytetin lindor të Bahmutit, pavarësisht se Rusia ka pretenduar se ka avancuar në këtë qytet, tha ushtria ukrainase. Njoftimet për luftime të ashpra në Bahmut vijnë në kohën kur Shtetet e Bashkuara kanë njoftuar për një paketë të re ushtarake për Kievin dhe Bashkimi Evropian pritet që të diskutojë për paketën e re të sanksioneve, për shkak të luftës që Moska ka nisur ndaj Ukrainës. Forcat ruse kanë kryer 46 sulme ndaj pozicioneve ukrainase në vijën e frontit Bahmut-Avdijivka-Marjinka në rajonin lindor të Donjeckut, ku Moska ka përqendruar përpjekjet kryesore të luftës, tha Shtabi i Përgjithshëm i ushtrisë ukrainase. Përveç bombardimeve të vazhdueshme, forcat ruse po ashtu kanë përdorur avionë për të sulmuar pozicionet ukrainase në Avdijivka, tha ushtria. Yevgeny Prigozhin, kreu i grupit rus të mercenarëve, Ëagner, pretendoi se forcat e tij po bëjnë përparim në Bahmut. Por, më pasi ai akuzoi Ministrinë e Mbrojtjes së Rusisë se ka dështuar të furnizojë luftëtarët e tij me municion të mjaftueshëm dhe akuzoi trupat ruse se po ikin nga luftimet përreth Bahmutit. Këto deklarata ishin të fundit në serinë e pakënaqësive që ai ka shprehur publikisht për zyrtarët ushtarakë rusë. Ai ia ka lënë fajin mungesës së municioneve për paaftësinë e grupit të tij që të marrë kontrollin e Bahmutit dhe vetëm disa ditë më parë kërcënoi se do të tërheqë trupat nga qyteti, por më vonë tha se forcat e tij kishin filluar të merrnin municione. Të mërkurën ndërkohë, guvernatori i rajonit rus, Kursk, që gjendet në kufi me Ukrainën, tha se një “dron armik” ishte rrëzuar. Ai pretendoi se droni u rrëzua në afërsi të Kurskut, dhe copëzat e tij ranë në fshatin Tolmaçovo, duke shkaktuar disa dëme materiale.