Komisioneri për zgjerim i Bashkimit Evropian, Oliver Varhelyi, ka filluar sot një turne në rajonin e ballkanit, me ndalesën e parë në kryeqytetin e serbisë, Beograd. Varhelyi, së bashku me kryeministren e Serbisë, Ana Bërnabiq, do të vizitojnë Institutin e Shëndetit Publik “Dr Milan Jovanoviq Batut”, njoftoi Qeveria serbe. Një ditë më vonë, zyrtari evropian do të qëndrojë në Bosnje e Hercegovinë, Mal të Zi dhe Maqedoni të Veriut, ndërsa të mërkurën do të vizitojë Shqipërinë dhe Kosovën, ka njoftuar më herët Komisioni Evropian. Gjatë vizitës në rajon, Varhelyi do të bisedojë me zyrtarët vendas për pandeminë e koronavirusit dhe mbështetjen e BE-së në këtë plan, është thënë në njoftim. Rajoni i ballkanit perëndimor ka qenë prej kohësh i pakënaqur me Bashkimin Evropian për sa i takon furnizimit të munguar me vaksina dhe si rezultat, disa vende kthyen sytë nga kina dhe rusia për të marrë që andej dozat e shumënevojshme. Tani BE ka premtuar se shumë shpejt do të ndajë për ballkanin 651 mijë doza vaksine, vetëm në hapin e parë.