Shtatë prokurorë dhe pesë gjyqtarë depozituan kandidaturën e tyre për të plotësuar vendet vakante pranë Këshillit të Lartë Gjyqësor dhe Këshillit të Lartë të Prokurorisë. Administrata e Gjykatës së Lartë dhe Prokurorisë së Përgjithshme, brenda 7 ditëve do të verifikojë plotësimin e kushteve ligjore të kandidatëve dhe do të bëjë shpalljen e kandidatëve zyrtarë. Në Këshillin e Lartë Gjyqësor për plotësimine e tre vakancave do të zgjidhen dy gjyqtarë nga gjykatat e shkallës së pare, ku interes kanë shprehur Alma Kodraliu nga Gjykata e Shkallës së Parë të Juridiksionit të Përgjithshëm të Tiranës, Gentjana Muçaj nga Gjykata Administrative e Shkallës së Parë së Tiranës dhe Markelian Koça nga Gjykata e Shkallës së Parë së Durrësit. Ndërkohë një gjyqtar do të zgjidhet nga gjykata e apelit dhe interes kanë shprehur Emona Muçi dhe Irida Kacerja, nga Gjykata e Apelit të Juridiksionit të Përgjithshëm Tiranë.