Gjermania po planifikon të krijojë një operacion të përbashkët të NATO-s në Arktik në një përpjekje për të bindur Donald Trump të mos aneksojë Groenlandën. Misioni "Arctic Sentry" për të monitoruar kërcënimet në rajon mund të modelohet sipas operacionit "Baltic Sentry" të NATO-s, i cili filloi vitin e kaluar për të kundërshtuar aktivitetin armiqësor dhe për të mbrojtur infrastrukturën në Detin Baltik, thanë burime për Bloomberg. Trump ka kërcënuar se do të përdorë edhe forcën ushtarake nëse do të jetë e nevojshme për të marrë kontrollin e territorit autonom të pasur me minerale të Danimarkës, një anëtare e NATO-s. Paralajmërimet e presidentit amerikan, veçanërisht pas sulmit të SHBA-së ndaj Venezuelës, kanë ngjallur shqetësime mes udhëheqësve evropianë dhe brenda NATO-s. Doëning Street po ashtu ka qenë në bisedime me aleatët evropianë ditët e fundit në lidhje me vendosjen e një force ushtarake në Groenlandë. Planet, ende në një fazë të hershme, mund të përfshijnë ushtarë, anije luftarake dhe aeroplanë britanikë që do të përdoren për të ruajtur ishullin. Evropa shpreson se një plan i tillë do të ishte i mjaftueshëm për të bindur Trumpin që të heqë dorë nga pretendimi i tij për të marrë nën kontroll territorin. Të dielën, Lars Klingbeil, zëvendëskancelari i Gjermanisë, i kërkoi SHBA-së të respektojë ligjin ndërkombëtar dhe sovranitetin e Groenlandës. "Është vetëm çështje e Danimarkës dhe Groenlandës, ato mund të vendosin për të ardhmen e Greenlandës," tha Klingbeil. Trump ka këmbëngulur vazhdimisht se SHBA-të duhet të "zotërojnë" Greenlandën, duke përmendur arsye sigurie. Të premten, ai tha se Moska ose Pekini do ta pushtojnë ishullin nëse ai nuk e bën këtë, duke këmbëngulur se "nuk do që të ketë Rusinë ose Kinën si fqinj". Ai ka thënë vazhdimisht, pa prova, se anijet ruse dhe kineze operojnë pranë ishullit, gjë që Danimarka e kundërshton.