Drejtoria e Inteligjencës në Ministrinë ukrainase të Mbrojtjes, tha se ushtria e Ukrainës ka dëmtuar dy anije zbarkuese ruse në Krimenë e pushtuar, në sulmet e kryera mëngjesin e të premtes. “Po, ky informacion është i vërtetë”, tha zyrtari i inteligjencës së ushtrisë ukrainase, Andriy Yusov, pas raportimeve të mediave vendase. Në raportimet e mediave thuhej se sulmi është kryer në Çornomorske, në pjesën perëndimore të Krimesë, dhe se janë vendosur në shënjestër dy anije zbarkuese të shpejta ruse. Ministria ruse e Mbrojtjes, tha në anën tjetër se brojtja e saj ajrore kishte shkatërruar tre dronë ukrainas mbi territorin e Krimesë dhe në rajonin Tula, në jug të Moskës. Zyrtarët ukrainas, në një kundërpërgjigje të shpejtë, thanë se dronët rusë kanë sulmuar rajonet ukrainase Dnjipropetrovk, Harkiv, Mikolaiv, Poltava dhe Kiev. Sipas tyre, mbrojtja ajrore e kievit ka rrëzuar pesë dronë iranianë dhe një raketë lundruese. Deri më tani nuk ka raportime për të plagosur apo dëme tjera. Një ditë më parë ndërkohë, presidenti ukrainas, Volodymyr Zelensky, firmosi ligjet që vazhdojnë gjendjen e luftës dhe mobilizimin e përgjithshëm edhe për 90 ditë të tjera. Ligjet, u miratuan më herët në parlament dhe e zgjasin tani gjendjen e luftës deri më 14 shkurt 2024.