Ukraina ka shpërfillur thirrjet amerikane që të mos shënjestrojë në sulmet e saj rafineritë ruse të naftës, nga frika se dëmtimi i tyre mund të rrisë çmimin e karburanteve në tregjet globale. Autoritetet në Moskë njoftuan se rafineria e tretë më e madhe në vend, e ndodhur rreth 1300 kilometra larg frontit të luftës ishte objekt i një sulmi me dronë. Rusia thotë se nga shpërthimet nuk janë shkaktuar dëme të pariparueshme të rafinerisë që proceson mbi 150 mijë fuçi nafte në ditë. Paralajmërimet e përsëritura nga Uashingtoni që të mos goditen rafineritë ruse u janë përcjellë zyrtarëve të lartë të SBU, shërbimit të sigurimit shtetëror të Ukrainës dhe drejtorisë së saj të inteligjencës ushtarake të njohur si GUR. Që nga fillimi i pushtimit rus, këto dy shërbime të inteligjencës ukrainase kanë zgjeruar vazhdimisht programet e tyre të dronëve për të përfshirë objektivat ruse në tokë, det dhe në ajër.