Delegacionet nga Rusia dhe Ukraina takohen për bisedime të drejtpërdrejta për paqe për herë të parë pas më shumë se tre vjetësh në Stamboll. Megjithatë, përbërja e tyre është në një nivel teknik, pasi presidenti rus, Vladimir Putin, ka bërë të ditur se nuk do të marrë pjesë. Bisedimet mbahen në Pallatin Dolmabahçe, në Stamboll, dhe do të jenë private, pa praninë e mediave, kanë raportuar mediat ruse. Ministria e Jashtme ruse njoftoi se bisedimet janë shtyrë për gjysmën e dytë të ditës, me nismën e Turqisë. Më herët ishte paralajmëruar që bisedimet do të mbaheshin në orët e paradites. Presidenti ukrainas, Volodymyr Zelensky, është nisur drejt Turqisë, sipas agjendës së tij, edhe pse Putin ka refuzuar të udhëtojë për të marrë pjesë në bisedime. Zelensky do të takohet me presidentin turk, Recep Tayyip Erdogan, në Ankara, por nuk do të marrë pjesë në bisedimet në Stamboll.