Ukraina ka rritur ndjeshëm numrin e sulmeve të nisura kundër rafinerive ruse të naftës në muajt e fundit, duke shkaktuar mungesë karburanti dhe rritje çmimesh në disa pjesë të vendit, ka zbuluar BBC. Sulmet me dronë ndaj rafinerive - disa thellë brenda Rusisë - u rritën në gusht dhe mbetën të larta në shtator, tregoi një analizë e raporteve të mediave ruse dhe pamjeve të verifikuara. Rreth 21 nga 38 rafineritë e mëdha të vendit - ku nafta bruto shndërrohet në karburant të përdorshëm si benzina dhe nafta - janë goditur që nga janari, me sulme të suksesshme që janë tashmë 48% më të larta se në të gjithë vitin 2024. Rusët e zakonshëm duket se po e ndiejnë ndikimin e sulmeve, me video të verifikuara që tregojnë radhë të gjata në stacionet e benzinës. Shërbimi i sigurisë së Ukrainës, SBU, nuk iu përgjigj një kërkese për koment. Por Presidenti Volodymyr Zelensky ka thënë se dëmtimi i industrisë së naftës së Rusisë është një mjet kyç për ta detyruar Rusinë të ulet në tryezën e negociatave. "Sanksionet më efektive - ato që funksionojnë më shpejt - janë zjarret në rafineritë e naftës të Rusisë, terminalet e saj, depot e naftës", tha udhëheqësi ukrainas në një fjalim në shtator. "Ne e kemi kufizuar ndjeshëm industrinë e naftës të Rusisë dhe kjo e kufizon ndjeshëm luftën". Analiza e BBC tregon ndërkohë se sulmet e raportuara arritën një nivel rekord në gusht, me 14 rafineri të shënjestruara nga dronë ukrainasë dhe tetë në shtator. Rritja erdhi pas një qetësie të shkurtër që përkoi me një valë diplomacie, gjatë së cilës Presidenti Donald Trump u përpoq të ndërmjetësonte një marrëveshje armëpushimi midis Kievit dhe Moskës.