Presidenti Donald Trump më në fund ka gjetur një mënyrë për t'i dërguar armë ukrainës, ashtu sic i pëlqen atij...: u ka kërkuar evropianëve të dhurojnë armët e tyre ndërkohë që do tu shesë aleatëve armë zëvendësuese amerikane. Por tani, vjen pjesa e vështirë. Evropianët duhet të bien dakord se kush do të heqë dorë nga sistemet e tyre të cmuara, duke përfshirë bateritë e raketave Patriot që Kievi i ka kërkuar me dëshpërim. "Ne do të prodhojmë armë të nivelit të lartë dhe ato do t'i dërgohen NATO-s", tha Trump në Zyrën Ovale të hënën. Disa sisteme mbrojtëse raketore Patriot duhet të mbërrijnë në Ukrainë "brenda disa ditësh", shtoi Trump, i cili përballet me rezistencë nga disa figura të profilit të lartë në lëvizjen MAGA që kundërshtojnë mbështetjen e SHBA-së për Ukrainën. Sistemet e kushtueshme Patriot, të kërkuara shumë nga aleatët e SHBA-së, kanë rezultuar efektive në shkatërrimin e raketave balistike ruse që shënjestrojnë qytetet e Ukrainës. SHBA-të gjithashtu kanë sinjalizuar gatishmëri sipas marrëveshjes së propozuar me aleatët evropianë për të dërguar armë shtesë sulmuese, tha një burim i njohur me çështjen, megjithëse Trump ka thënë se Ukraina duhet të përmbahet nga sulmet ndaj Moskës. Plani, të cilin Trump dhe Sekretari i Përgjithshëm i NATO-s, Mark Rutte, hartuan ditët e fundit, sipas dy burimeve të njohura me diskutimet, është pritur pozitivisht nga Ukraina dhe aleatët e saj. Udhëheqësit në Kiev kanë festuar një ndryshim të madh të tonit nga Trump, i cili deri në javët e fundit fliste me entuziazëm për Presidentin rus Vladimir Putin. Por që nga njoftimi, është bërë e qartë se Trump paraqiti një kornizë - jo një plan të detajuar. Se sa armë do ti dërgohen Ukrainës kjo do të varet nga negociatat e ardhshme se kush do të ofrojë cilat pajisje. "Si gjithmonë, djalli fshihet në detaje", tha një ambasador evropian në Uashington. Pyetja kryesore është se kush do t'i dhurojë bateritë Patriot dhe kur. Gjatë takimit të tij në Zyrën Ovale me Trump të hënën, Rutte përmendi gjashtë vende të NATO-s - Finlanda, Danimarka, Suedia, Norvegjia, Holanda dhe Kanadaja - që janë të gatshme të merrnin pjesë në skemën e blerjes së armëve. Burime në ambasadat e dy prej këtyre vendeve në SHBA i thanë Reuters se ata personalisht mësuan për planin ndërkohë që ai njoftohej. Edhe aleatët e ngushtë të SHBA-së duket se mësuan për propozimin në kohë reale.