Prokuroria e Sarandës ka përfunduar hetimet dhe ka dërguar për gjykim 16 persona, të akuzuar për veprën penale “Prodhim dhe shitje narkotikësh”, të kryer në bashkëpunim dhe më shumë se një herë. Sipas Prokurorisë, hetimet që kanë nisur para një viti, të zhvilluara me metoda proaktive, përfshirë vëzhgime dhe përgjime, zbuluan se të pandehurit ushtronin aktivitet të strukturuar të shpërndarjes së lëndëve narkotike në qytetet Sarandë dhe Delvinë, kryesisht tek moshat e reja. Nga hetimet rezultoi se disa prej të pandehurve bashkëpunonin për sigurimin dhe shitjen e drogës, ndërsa tre prej tyre janë marrë të pandehur edhe për veprën penale “Drejtimi i automjeteve në mënyrë të parregullt”, pasi u provua se kanë qenë nën efektin e lëndëve narkotike në momentin e ndalimit nga policia. Në mesin e të akuzuarve, një shtetas po hetohet edhe për veprën penale “Prodhimi, mbajtja, blerja apo shitja pa leje e armëve të ftohta”, ndërsa pjesa tjetër për veprën penale “Prodhim dhe shitje narkotikësh”.