Tre ditë pas votimit të mocionit të mosbesimit ndaj Qeverisë së Malit të Zi, Kuvendi i këtij vendi pritet të vendosë tani për shkarkimin e kryetarit të tij, Aleksa Beçiç. Ky i fundit është udhëheqës i Demokratëve, që kanë qenë kundër rrëzimit të Qeverisë së kryeministrit Zdravko Krivokapiç. Nismën për shkarkimin e Beçiçit e kanë firmosur 38 deputetë të opozitës nga Partia Demokratike e Socialistëve (DPS), e udhëhequr nga presidenti aktual i Malit të Zi, Millo Gjukanoviç, dhe nga Partia Boshnjake e Koalicioni Shqiptar "Njëzëri". Në shpjegim është thënë se Kuvendi, për shkak të mungesës së dialogut esencial, "nuk ka çuar në përshpejtimin e rrugës evropiane të Malit të Zi", sepse Beçiç, "funksionin e tij e ka kryer në interes të promovimit partiak dhe personal, e jo në interes të shtetit".