Ndërsa shumë vende të botës janë të hutuar dhe frikësuar nga fitorja e donald trump në zgjedhjet presidenciale amerikane, një fshat në ishullin italian të Sardenjës ka nuhatur një mundësi të re. Ashtu si shumë vende të tjera në Italinë rurale, Ollolai ka kohë që po përpiqet të bindë të huajt që të vendosen atje me qëllim që të ringjallet pas dekadash shpopullimi. Fshati ka shitur shtëpi të rrënuara për një euro, në përpjekje për të joshur banorë të rinj të mundshëm. Tani, pas rezultatit të votimit të 5 nëntorit, Ollolai ka hapur një faqe në internet që ka në shënjestër emigrantët e mundshëm amerikanë, duke ofruar më shumë shtëpi të lira me shpresën se ata, të mërzitur nga rezultati i zgjedhjeve, do të nxitojnë të blejnë një nga pronat e zbrazura për vetëm 1 dollar. “A jeni lodhur nga politika globale? Po kërkoni të përqafoni një mënyrë jetese më të ekuilibruar duke siguruar mundësi të reja?” pyet faqja e internetit. "Është koha të filloni të mendoni për arratisjen tuaj në parajsën mahnitëse të Sardenjës." Kryebashkiaku Francesco Columbu i tha CNN se faqja e internetit u krijua posaçërisht për të tërhequr votuesit amerikanë në prag të zgjedhjeve presidenciale. Ai thotë se i do Shtetet e Bashkuara dhe është i bindur se amerikanët janë njerëzit më të mirë të mundshëm për të ndihmuar në ringjalljen e komunitetit të tij. Columbu thotë se fshati tani po ofron tre nivele akomodimi: shtëpi të përkohshme falas për disa nomadë dixhitalë, shtëpi me vlerën një euro që kanë nevojë për rinovim dhe shtëpi të gatshme për banim me çmim deri në 100,000 euro. Në shekullin e kaluar, popullsia e Ollolait është zvogëluar nga 2,250 në 1,300 me vetëm një numër të vogël foshnjash të lindura çdo vit. Shumë familje janë larguar nga fshati në kohë të vështira ekonomike, në kërkim të një jete më të mirë. Gjatë viteve të fundit, popullsia ka rënë më tej në 1,150 banorë.