Një 45-vjeçar ka ndërruar jetë në burgun e Lezhës këtë të hënë. Sipas informacioneve paraprake, i burgosuri, Gëzim Beneshi ka ndërruar jetë gjatë konsumimit të mëngjesit. Viktima, sipas kartelës mjekësore të tij kishte probleme me shëndetin mendor, ndërsa me burg ishte dënuar me akuzën e vrasjes së mbetur në tentativë. Ai është diagnostikuar më herët me 'Skizofreni paranoide' dhe 'Hipertension arterial', të cilat kërkojnë kujdes të vazhdueshëm. Autoritetet e burgut të Lezhës njoftojnë se i kanë ofruar menjëherë ndihmën e parë mjekësore dhe më pas e kanë transportuar drejt spitalit rajonal të qytetit. Por, edhe pse u bë çdo përpjekje për të ndihmuar, sipas njoftimit, në Spitalin Rajonal të Lezhës është konstatuar vdekja e tij. Në lidhje me rastin është ngritur një grup hetimor për të zbardhur plotësisht shkakun e vdekjes. Paraprakisht dyshohet se atij i ka kaluar keq ushqimi duke i bllokuar rrugët e frymëmarrjes.