Qeveria e Turqisë e ka paralajmëruar të premten partinë kryesore opozitare kundër thirrjeve “të jashtëligjshme” për protesta në rrugë, në lidhje me arrestimin e kryebashkiakut të Stambollit, Ekrem Imamoglu. Mijëra njerëz protestuan në dy ditët e fundit në gjithë vendin. Ministri i Brendshëm i Turqisë, Ali Yerlikaya, tha se 53 njerëz janë arrestuar dhe 16 oficerë policie janë lënduar në protestat që filluan në kampuse universitare, selinë e bashkisë së Stambollit dhe në pjesë të tjera të vendit të enjten. Imamoglu, rivali kryesor politik i presidentit Recep Tayyip Erdogan, u arrestua të mërkurën nën akuzat për korrupsion dhe mbështetje të një grupi terrorist. Partia kryesore opozitare e Imamoglut, Partia Popullore Republikane, ka thënë se arrestimi i tij është i nxitur politikisht dhe u ka bërë thirrje njerëzve të dalin në protesta. Arrestimi i Imamoglu është dënuar nga liderët evropianë. Yerlikaya dhe ministri i Drejtësisë, Yilmaz Tunc, i kritikuan thirrjet për veprim nga lideri i Partisë popullore republikane, Özgür Özel, duke i quajtur "të papërgjegjshme". "Grumbullimi në protesta është e drejtë themelore. Por thirrja për të dalë në rrugë për një hetim të vazhdueshëm ligjor është e paligjshme dhe e papranueshme", tha Tunc në X të premten. Tunc tha se gjykata është vendi për t’iu përgjigjur çdo procesi ligjor dhe bëri thirrje për qetësi, duke shtuar se "gjyqësori i pavarur dhe i paanshëm" po vlerëson çështjen. Turqia i ndaloi protestat për katër ditë pas arrestimit të Imamoglut, i cili kryeson para Erdoganit në disa prej sondazheve në Turqi. Të enjten u zhvilluan demonstrata në Ankara, Izmir dhe Stamboll, si dhe në provinca të tjera në të gjithë vendin, ndërsa policia ngriti barrikada në disa rrugë kryesore. Erdogan i ka hedhur poshtë kritikat e opozitës duke i cilësuar "skena teatrale" dhe "slogane" që largojnë vëmendjen nga gabimet e saj të brendshme.