"Nagorno-Karabaku është territor i Azerbajxhanit," tha presidenti turk Recep Tayyip Erdogan në OKB, duke shtuar se çdo status tjetër për këtë territor "nuk do të pranohet kurrë". Para deklaratës së Erdoganit edhe Ministria e Jashtme turke kishte deklaruar se: "Si rezultat i shqetësimeve legjitime dhe të justifikuara që ka shprehur vazhdimisht në lidhje me situatën në terren gjatë gati tre vjetëve, që nga përfundimi i Luftës së Dytë të Karabakut, Azerbajxhaniti është detyruar të marrë masa që i konsideron të nevojshme në territorin e vet sovran”. Por, pavarësisht këtyre deklaratave, diplomatët turq u kërkuan të gjitha palëve t'u kthehen bisedimeve të paqes. "Ne besojmë se sigurimi i vazhdimit të procesit të negociatave gjithëpërfshirëse midis Azerbajxhanit dhe Armenisë... është e vetmja mënyrë për të vendosur paqen, sigurinë, prosperitetin dhe stabilitetin e përhershëm në rajon", thuhet në një deklaratë të palës turke. Në anën tjetër, gjermania është vendosur përballë turqisë në OKB, duke akuzuar Azerbajxhanin se ka shkelur marrëveshjen e paqes. Ministrja e Jashtme e Gjermanisë, Annalena Berbock, e akuzoi Azerbajxhanin se kishte thyer premtimin për t'u përmbajtur nga veprimet ushtarake. Duke folur në kuadër të Asamblesë së Përgjithshme të Kombeve të Bashkuara në Nju Jork, Baerbock tha: "Azerbajxhani duhet të ndalojë menjëherë bombardimet dhe të kthehet në tryezën e bisedimeve." Në anën tjetër, Franca i ka kërkuar Këshillit të Sigurimit të Kombeve të Bashkuara që të mblidhet menjëherë pas operacioneve ushtarake të Azerbajxhanit. Ministria e Jashtme franceze tha në një deklaratë se asnjë pretekst nuk mund të justifikojë operacionin ushtarak të Azerbajxhanit të nisur në Nagorno-Karabakh. Sipas ministrisë së jashtme franceze, shpërthimi i luftimeve "kërcënon mijëra civilë tashmë të prekur nga një bllokadë e paligjshme disamujore dhe që bie ndesh me përpjekjet e komunitetit ndërkombëtar për të arritur një zgjidhje të negociuar".