Turqia i ka kërkuar Perëndimit të marrë masa ndaj Izraelit, në një kohë kur duket se shteti izraelit po mendon të përhap luftën në rajon pas sulmeve ndaj Libanit. Presidenti i Turqisë, Recep Tayyip Erdogan në një konferencë për shtyp u bëri thirrje vendeve perëndimore të marrin masa parandaluese kundër veprimeve të Izraelit. Presidenti turk është shprehur se lufta e Izraelit në Gaza do të jetë tema kryesore e fjalimit të tij në Asamblenë e Përgjithshme të OKB-së më 24 shtator. “Që rajoni ynë të mos tërhiqet në një katastrofë të madhe, presioni mbi Izraelin duhet të rritet edhe më shumë”, mësohet të ketë thënë Erdogan gjatë konferencës për shtyp në Stamboll. “Për ta ndalur këtë shtypje që po vazhdon prej gati një viti, për ta vendosur një armëpushim të përhershëm dhe për të siguruar rrjedhën e pakufizuar të ndihmave humanitare, të gjithë ne, bota e tërë dhe veçanërisht OKB-ja, kemi detyra të rëndësishme,” shtoi ai. Ndërkohë shtoi se është koha që të gjitha vendet me misionin e mbrojtjes së paqes botërore të gjejnë zgjidhje që do ta ndalë Izraelin. Turqia ka dënuar veprimet e Izraelit në Gaza, të cilat erdhën pas sulmit të Hamasit, grupit palestinez të shpallur organizatë terroriste nga SHBA-ja dhe BE-ja, më 7 tetor.