Një ngjarje e rëndë është regjistruar në plazhin e Filikurit, në zonën e Potamit në Himarë, ku një turiste 23-vjeçare me shtetësi holandeze ka humbur jetën si pasojë e një rrëzimi nga lartësia. Ngjarja ndodhi teksa disa turistë të huaj, të apasionuar pas sporteve ekstreme si alpinizmi dhe hiking, kishin zgjedhur të zbrisnin drejt plazhit përmes një rruge të rrezikshme shkëmbore, duke shmangur rrugën tradicionale detare ose atë këmbësore. Sipas informacioneve paraprake, e reja ka rrëshqitur aksidentalisht nga një lartësi prej rreth 30 metrash. Menjëherë pas njoftimit, në vendngjarje kanë ndërhyrë strukturat e Policisë së Himarës, policia kufitare, forcat zjarrfikëse dhe një ambulancë. Ekipet e shpëtimit kanë bërë të mundur nxjerrjen e trupit të pajetë nga zona e thepisur, por fatkeqësisht e reja nuk ka arritur të mbijetojë për shkak të plagëve të rënda. Për pasojë është plagosur edhe një vajzë 18-vjeçare, e cila ka pësuar dëmtime nga rënia e gurëve, por ndodhet jashtë rrezikut për jetën. Turistët e tjerë në zonë janë ndihmuar të largohen në mënyrë të sigurt, ndërsa autoritetet kanë nisur hetimet për të zbardhur plotësisht rrethanat e kësaj ngjarjeje të rëndë.