Forcat ruse kanë vazhduar të sulmojnë me zjarr artilerie pozicionet ukrainase përgjatë vijës së frontit në lindje, ndërsa sulmet janë përqendruar në Bahmut dhe Avdijivka në Donjeck. Sipas Shtabit të Përgjithshëm të ushtrisë ukrainase në këto dy qytete po zhvillohen luftimet më të ashpra në muajt e fundit. Rusia sërish ka sulmuar objektiva civilë në rajonin jugor dhe në qytetin e Hersonit dhe ka bombarduar Dnipropetrovskun, tha ushtria dhe zyrtarët rajonalë. “Armiku po vazhdon ofensivën në drejtimit të Bahmutit dhe Avdijivkës në Donjeck dhe ka tentuar që të përmirësojë pozicionin e tij taktik në drejtim të Limanit, në Luhansk”, tha Shtabi i Përgjithshëm ukrainas. Trupat ruse kanë kryer 33 sulme me artileri dhe një sulm ajror ndaj pozicioneve të ushtrisë ukrainase dhe civilëve në Herson gjatë 24 orëve të fundit, u tha në njoftim.