Presidenti amerikan Donald Trump, ka lënë të kuptohet se tarifat amerikane ndaj mallrave nga Kina mund të ulen, ndërsa zyrtarët e lartë të tregtisë nga dy ekonomitë më të mëdha në botë pritet të zhvillojnë bisedime. "Nuk mund të shkojmë më lart. Janë 145 përqind, ndaj, duhet të ulen ", tha ai, duke iu referuar taksave të reja të importit të vendosura ndaj Kinës pasi ai u kthye në Shtëpinë e Bardhë. Trump i bëri komentet gjatë një eventi për të zbuluar një marrëveshje tarifash me Mbretërinë e Bashkuar, marrëveshja e parë e këtij lloji që kur ai goditi vendet anembanë botës, me taksa të larta në prill. Takimi në Zvicër këtë fundjavë është sinjali më i fortë deri më tani se të dy palët janë të gatshme të ulin tensionet në një luftë tregtare që ka tronditur tregjet financiare. "Mendoj se është një takim shumë miqësor. Ata mezi presin ta bëjnë këtë në një mënyrë elegante", tha Trump për bisedimet me Kinën. Zëvendësministrja e Jashtme e Kinës, gjithashtu shprehu besim përpara bisedimeve, duke thënë se Pekini ka "besim të plotë" në aftësinë e tij për të menaxhuar çështjet tregtare me SHBA-në. Njoftimi më herët këtë javë, për bisedimet, u mirëprit si një hap i parë i rëndësishëm drejt lehtësimit të tensioneve, por analistët kanë paralajmëruar se kjo shënon vetëm fillimin e asaj që ka të ngjarë të jetë negociata e gjatë.