Presidenti amerikan, Donald Trump ka mbrojtur sërish përdorimin e ilaçit për malarien, hidroksiklorinën, si trajtim për koronavirusin e ri, duke qëndruar mbrapa vendimit të tij për të shpërndarë disa video në rrjetin social, Twitter që promovojnë ilaçin në fjalë. Hidroksiklorina është larguar nga lista e ilaçeve për parandalim apo trajtim të sëmundjes, Covid-19, që shkakton koronavirusi. Mirëpo Trump, që shumë herë në të kaluarën ka treguar mbështetje për hidroksiklorinën, ka thënë më 28 korrik, se ai beson që ilaçi ka pasur efekt “në fazat e para”. Trump i ka bërë këto komente në Shtëpinë e Bardhë, teksa ka tentuar t’i rikthehet diskutimit për rizgjedhje si president, meqë sondazhet e fundit tregojnë se shumica e amerikanëve nuk pëlqejnë menaxhimin e krizës shëndetësore nga ana e tij.