Marco Rubio mbërriti në Panama të shtunën në udhëtimin e tij debutues jashtë vendit si Sekretar amerikan i Shtetit, ndërsa nis punën kështu për të jetësuar kërcënimin e rrallë të Presidentit Donald Trump për të marrë Kanalin e Panamasë. Misioni i Rubios vjen pasi Trump vendosi tarifa të larta ndaj Kanadasë, Meksikës dhe Kinës, një hap tjetër që tregon një politikë të jashtme shumë më agresive të SHBA-së. Rubio do të udhëtojë më vonë në katër vende të tjera të vogla të Amerikës Latine për një axhendë të fokusuar te migracioni, një udhëtim i parë jashtëzakonisht i pazakontë për kryediplomatin amerikan, paraardhësit e të cilit kishin më shumë gjasa ta fillonin punën me intensifikimin e përpjekjeve të bashkëpunimit me aleatët kryesorë. Trump ka refuzuar të përjashtojë mundësinë e përdorimit të forcës ushtarake për të marrë Kanalin e Panamasë, të cilin Shtetet e Bashkuara e dorëzuan në fund të vitit 1999, duke thënë se Kina ka ushtruar shumë kontroll përmes investimeve të saj në portet përreth. Në fjalimin e tij inaugurues, Trump tha se SHBA do ta "marrë përsëri" kanalin dhe nuk u tërhoq nga ky kërcënim të premten. "Ata tashmë kanë ofruar të bëjnë shumë gjëra," tha Trump për Panamanë, "por ne mendojmë se është e përshtatshme që ta kthejnë kanalin".